دۇنيا بەخت – سائادىتى ۋە ئاخىرەت نىجاتلىقى ئىمان نېمىتىدۇر

ئىمان ئىنسان ھاياتىنى ھەممە تەرىپى يېشىللىققا پۈركەنگەن بوستانلىققا ئايلاندۇرىدۇ. ئىنسان ئۆزىنى خۇددى سۇلىرى ئېقىپ تۇرغان، گۈل – چېچەككە پۈركەنگەن باغچىدا تۇرۇۋاتقاندەك، شۇ باغچىنىڭ دەل – دەرەخلىرىنىڭ سايىلىرى ۋە مېۋە – چىۋىلىرىدىن بەھىرلىنىۋاتقاندەك، بۇ دۇنيادا ھېچقانداق جاپا – مۇشەققەت تارتمىغاندەك ھېس قىلىدۇ.

پەيغەمبەر ئەلەيھىسسالام: «كۈچلۈك مۆمىن ئاجىز مۆمىندىن ئاللاھقا ياخشىراق ۋە سۈيۈملۈكرەكتۇر» دەيدۇ، يەنە بىر ھەدىستە: «مۆمىن كىشىنىڭ ئەھۋالىغا قاراڭلار! ئۇنىڭ ھەممە ئىشى ياخشىلىقتۇر. ئەگەر ئۇنىڭغا بىرەر خۇشاللىق كەلسە ئاللاھقا شۈكۈر ئېيتىدۇ. ئەگەر بىرەر زىيان – زەخمەتكە دۇچ كەلسە ئۇنىڭغا سەۋر قىلىدۇ. مانا بۇ مۆمىنلەرگىلا خاس پەزىلەتتۇر».

دېمەك، مۆمىن دائىم ئاللاھنىڭ نۇرىنى ۋە تەقدىر ھېكمىتىنى ھېس قىلىپ يېتەلەيدۇ. مەيلى خۇشاللىق ياكى غەم – قايغۇدا بولسۇن، ئاللاھنىڭ ئەمرىگە بويسۇنۇپ، ئاللاھ رىزالىقىنى ئىزدەپ، بېرىلىدىغان ئەجىر – ساۋابنى كۆزلەيدۇ. ھەتتا ئاللاھ تائالا مۆمىننىڭ پۇتىغا سانجىلغان تىكەننىڭ ئاغرىقىنى، ئۇنىڭ بىرقىسىم گۇناھلىرىنىڭ كاففارىتى ئورنىدا ھېسابلاپ مەغپىرەت قىلىۋېتىدۇ.

بۇ نېمە دېگەن چوڭ ئىلتىپات – ھە!

بۇ ھەقىقەتەنمۇ تەڭداشسىز بۈيۈك نېمەتتۇر. شۇڭا، باشقىلار مال – دۇنيا يىغىش بىلەن بەند بولسا، مۆمىن بەندە خۇددى پەيغەمبەر ئەلەيھىسسالامنىڭ ساھابىلىرى مال – دۇنيا يىغىشتا ئەمەس، بەلكى سالىھ ئەمەل ۋە ياخشىلىقلارنى قىلىشتا باشقىلار بىلەن بەسلەشكەندەك، ياخشى ئەمەللەرنى تالىشىپ تۇرۇپ قىلىدۇ. بۇ ھەقتە ئەبۇ زەر رەزىيەللاھۇ ئەنھۇدىن كەلگەن بىر ھەدىستە ساھابىلەر پەيغەمبەر ئەلەيھىسسالامغا: «ئى رەسۇلۇللاھ! بايلار ئەجىر – ساۋابتا كەمبەغەللەردىن ئېشىپ كەتتى. ئۇلار بىزگە ئوخشاش ناماز ئوقۇيدۇ، روزا تۇتىدۇ، ماللىرىنىڭ ئاشقىنىنى سەدىقە قىلىدۇ» دەپ، ئۆزلىرىنىڭ شۇ ئەجىر – ساۋابلارغا ئېرىشەلمىگەنلىكىدىن ھەسرەتلىنىۋاتقانلىنى ئىپادىلىگەندە، پەيغەمبەر ئەلەيھىسسالام ئۇلارغا تەسەللى بېرىپ ۋە ياخشىلىق دەرۋازىلىرىنى كۆرسىتىپ مۇنداق دەيدۇ: «ئاللاھ سىلەرگىمۇ سەدىقە قىلىدىغان پۇرسەتلەرنى بەرمىدىمۇ؟ ھەربىر تەسبىھ (يەنى، سۇبھانە ئاللاھ دېيىش)، ھەربىر تەھلىل (لا ئىلەھە ئىلەللاھ دېيىش)، ھەربىر تەكبىر، ھەربىر تەھمىد (ئەلھەمدۇلىللاھ دېيىش)، ياخشىلىققا بۇيرۇپ، يامانلىقتىن توسۇش سەدىقە ئەمەسمۇ؟» دەيدۇ. شۇنىڭدىن كېيىن ساھابىلەر پەيغەمبەر ئەلەيھىسسالامنىڭ قېشىغا ئىككىنچى قېتىم قايتا كېلىپ: «ئى رەسۇلۇللاھ! قېرىنداشلىرىمىز سىلى كۆرسەتكەن ياخشىلىق يوللىرىنى ئاڭلىغاندىن كېيىن بىز قىلغاندەك قىلىۋاتىدۇ دېۋىدى، پەيغەمبەر ئەلەيھىسسالام: «ئۇ ئاللاھنىڭ پەزلى – مەرھەمىتى، خالىغان كىشىگە بېرىدۇ» دېدى.

ساھابىلەرنىڭ ئەھۋالىنى بايان قىلىپ كەلگەن مۇسلىم رىۋايەت قىلغان بىر ھەدىستە، بەزى ساھابىلەر سەدىقە قىلىدىغان نەرسە تاپالماي قالاتتى، شۇنداق ئەھۋالدا ئاللاھ ئۇلارنى كەچۈرگەن بولسىمۇ ئۇلار قانداق قىلاتتى؟ ئۇلاردىن بىرى مۇنداق دەيدۇ: «ئارىمىزدا كۈچى بارلار ھامماللىق قىلاتتى. بۇ ھەرگىزمۇ كۆپرەك پۇل تېپىپ، باياشات ياشاش ئۈچۈن ئەمەس، ياكى خەزىنىلىرىنى مال – دۇنياغا تولدۇرۇش ئۈچۈنمۇ ئەمەس، ۋەياكى بۈگۈنكى زاماندا كىشىلەر ئېغىزىدىن چۈشۈرمەيدىغان كەلگۈسى ئۈچۈنمۇ ئەمەس، بەلكى ئاللاھ يولىدا سەدىقە قىلىدىغان بىرەر نەرسە تېپىش ئۈچۈنلا ئىدى.

ئۇلار نېمىدېگەن ئېسىل ئادەملەر – ھە! ئۇلاردىكى نېمىدېگەن يۈكسەك غايىلەر – ھە!

ئۇلارنىڭ نەزىرىدە بەخت – سائادەت دېگەن ئاللاھ ئۈچۈن بېغىشلاش، مۇسۇلمان قېرىندىشىنى قىيىنچىلىقتىن قۇتۇلدۇرۇش، پەيغەمبەر ئەلەيھىسسالامغا پۈتۈن ۋۇجۇدى بىلەن ئەگىشىشتۇر.

بۈگۈنكى كۈندە كىشىلەرنىڭ يالغانچىلىق، پىتنە – پاسات، خائىنلىق، مەسئۇلىيەتسىزلىك، غەيۋەت – شىكايەت، سۇخەنچىلىك پاتقىقىغا بارغانسېرى پېتىپ كېتىش كىشىنى چۆچۈتىدۇ.

ئەي مۆمىن قېرىندىشىم! تىلىڭىز دائىم ئاسمان – زېمىننىڭ ئىگىسى بولغان ئاللاھنى زىكرى قىلىش ۋە تەسبىھ ئېيتىش بىلەن بەند بولسۇن. پەيغەمبەر ئەلەيھىسسالام ھەركۈنى 70 قېتىم مەغپىرەت تىلەپ تۇرغاندەك، سىزمۇ ئاللاھدىن گۇناھلىرىڭىزغا مەغپىرەت تىلەپ تۇرۇڭ. (يەنە بىر ھەدىستە 100 قېتىم مەغپىرەت تىلەيدىغانلىقى بايان قىلىنغان)

پەيغەمبەر ئەلەيھىسسالامنىڭ: «تىلىڭ ھەمىشە ئاللاھنى زىكىر قىلىپ تۇرسۇن» دېگەن نەسىھىتىنى ئېسىڭىزدە چىڭ ساقلاپ، ئاللاھنى كۆپ زىكىر قىلىڭ. باشقىلار ئويۇن – تاماشا، ئازغۇنلۇقتا ئادىشىپ يۈرگەندە، سىز قۇلىقىڭىزنى، تىلىڭىزنى، دىلىڭىزنى قۇرئان – كەرىم تىلاۋىتىدىن بەھرىمەن قىلىڭ. كۆكسى – قارنىڭىزنى كەڭ تۇتۇپ، قەلبىڭىزنى پاكلاڭ، دۇنيانىڭ شاۋقۇن – سۈرەنلىرى ئىچىدە، باتىل سۆزلەر كۆپىيىپ كەتكەن بۈگۈنكىدەك كۈنلەردە تىلىڭىز قۇرئان كەرىم ئايەتلىرىدە بولسۇن.

مۇسۇلمان كىشى ھەمىشە باشقىلاردىن پەرقلىنىپ تۇرىدۇ، چۈنكى ئۇ ئاللاھنى زىكرى قىلىشنى تاشلاپ قويمايدۇ. ئومۇميۈزلۈك تەكىتلىنىپ كەلگەن ئىلاھىي كۆرسەتمىنىڭ مەقسەت – مۇددىئاسىنى ھېس قىلالايدۇ. بۇ ئىلاھىي بۇيرۇقنىڭ ئومۇمىيلىقىنى تۆۋەندىكى ئايەت – كەرىمە بايان قىلىپ بېرىدۇ: «ئى مۆمىنلەر! ئاللاھنى كۆپ ياد ئېتىڭلار»([1]) يەنى، ئاللاھنى زىكرى قىلىشنىڭ چەك –  چېگرىسى، ئاخىرقى نۇقتىسى ۋە مۇئەييەن ۋاقتى بولمايدۇ. بەلكى كېچە – كۈندۈزدە، ئەتىگەن – ئاخشامدا ۋە ھەرقانداق ۋاقىتتا ئاللاھنى زىكرى قىلىپ تۇرۇڭ. ھەربىر كۈنىڭىزنى ئاللاھنى زىكرى قىلىش بىلەن باشلاڭ، ئاللاھ سىزگە ئۆز رىزالىقىغا ئېلىپ بارىدىغان يول، دۇنيا بەخت – سائادىتىگە ئېلىپ بارىدىغان مول رىزىققا مۇيەسسەر قىلىدۇ. ئۇ كۈنىڭىزنى يەنە ئاللاھنى زىكرى قىلىپ ئاخىرلاشتۇرۇڭ، شۇندىلا، ئاللاھ پەزلى – مەرھەمىتى ئاستىدا ئەمىنلىككە ئىگە بولۇپ، خاتىرجەم تاڭ ئاتقۇزىسىز.

باشقىلار جىن – شەيتانلارنىڭ ئەسىرىگە ئايلانغاندا، يەنى، ئۇلارنىڭ بەزىلىرىگە جىن تەگكىنىدە، بەزىلىرى شەيتاننىڭ چاڭگىلىغا چۈشۈپ قالغىنىدا، سىز بۇ ئىشلاردىن ئاللاھنىڭ ئىزنى بىلەن ساقلىنىپ قالىسىز. بۇ نېمىدېگەن چوڭ بەخت! نېمىدېگەن ئۇلۇغ نېمەت! نېمىدېگەن زور ئىلتىپات ھە!

ئەي مۆمىن قېرىندىشىم! بەزى كىشىلەر كېچىلىرىنى بىھۇدە شاۋقۇن – سۈرەن، گۇناھ – مەئسىيەت، تېتىقسىز چاقچاقلار ۋە شەھۋانىي فىلىملەرگە بېرىلىش بىلەن ئۆتكۈزۈۋاتقان شۇ دەقىقىلەردە، سىز ھاياتلىقنىڭ شاۋقۇنلىرىدىن كېچىنىڭ جىمجىتلىقىغا يۈزلىنىڭ. خۇددى پەيغەمبەر ئەلەيھىسسالام: «پەرۋەردىگارىمىز كېچىنىڭ ئاخىرقى ئۈچتىن بىرىدە دۇنيا ئاسمىنىغا چۈشۈپ: ›تىلەك تىلىگۈچىلەر بارمۇ؟ ئىجابەت قىلىمەن، گۇناھلىرىدىن تەۋبە قىلغۇچىلار بارمۇ؟ تەۋبىسىنى قوبۇل قىلىمەن، گۇناھلىرىغا مەغپىرەت تىلىگۈچىلەر بارمۇ؟ مەغپىرەت قىلىمەن‹ دەيدۇ ھەمدە بۇ مەرھەمەت ھەر كېچىسى شۇنداق بولىدۇ» دەپ بايان قىلىپ بەرگىنىدەك، بۇنداق ئەڭ ئۇلۇغ ۋاقىت قىلىنغان، ئەڭ زور ئىلتىپاتلار ئاتا قىلىنىدىغان سائەتلەردە ئاللاھقا يۈزلىنىپ بىر نەچچە رەكەت ناماز ئوقۇڭ.

خوش، ئۇنداقتا ئاۋۇ غەپلەتتە قالغانلار ۋە ئاسىي گۇناھكارلار بۇ ئىلتىپاتلاردىن قانداقمۇ بەھرىمەن بولالىسۇن؟

ئاللاھ بىلەن قەسەمكى، ئەلۋەتتە، ئۇلار بۇ ئىلتىپاتلاردىن جەزمەن مەھرۇم قالىدۇ.

ئەمما، سىز كېچىلىك نامازنى، سەھەردىكى تەسبىھ – دۇرۇتلارنى قولدىن بەرمىسىڭىز ھەمدە ئاشۇ پەزىلەتلىك ۋاقىتلاردا ھەقىقىي چىن ئىخلاس بىلەن ياش تۆكەلىسىڭىز، قۇرئان تىلاۋەت قىلىش، ئاللاھنى زىكىر قىلىش ۋە دۇئا – ئىستىغپارنى داۋاملاشتۇرالىسىڭىز، دېمەك سىز پەيغەمبەر ئەلەيھىسسالامنىڭ: «سالام قىلىشنى ئومۇملاشتۇرۇڭلار، پېقىر – مىسكىنلەرگە تائام بېرىڭلار، سىلە – رەھىمنى ئۇلاڭلار، كېچىلىرى باشقىلار ئۇخلاۋاتقاندا ناماز ئوقۇڭلار، شۇندىلا پەرۋەردىگارىڭلارنىڭ جەننىتىگە تىنچ – ئامان كىرىسىلەر» دېگەن ۋەدىسىگە ئېرىشىدىغان ئەڭ تەلەيلىك ۋە نېسىۋىلىك ئادەم بولۇپ ھېسابلىنىسىز.

چىرايلىرى تۇتۇلغان، قوشۇمىسى تۈرۈلگەن ھالدا ئۇيقۇلىرىدىن ئويغانغان كىشىلەرنىڭ ھالى نېمە بولار؟

ھەقىقىي مۆمىن دېگەن پەيغەمبەر ئەلەيھىسسالام بايان قىلىپ بەرگىنىدەك، قەلبى ئىسلامغا ئېچىلغان، ھەر كۈنىنى يۇقىرىقىدەك ئىبادەت ۋە ئاللاھ بىلەن مۇناجاتلىشىش بىلەن باشلايدىغان كىشىدۇر. ئەبۇ ھۇرەيرە رەزىيەللاھۇ ئەنھۇ رىۋايەت قىلغان ھەدىستە پەيغەمبەر ئەلەيھىسسالام مۇنداق دەيدۇ: «ئۇخلىغان ۋاقتىڭلاردا شەيتان سىلەرنىڭ گەدىنىڭلارغا ئۈچ تۈگۈن سالىدۇ، ھەر بىر تۈگۈندە ‹ئۇخلاۋەرگىن، كېچە تېخى ئۇزۇن› دەيدۇ. ئەگەر ئويغانسا ۋە ئاللاھنى زىكىر قىلسا بىر تۈگۈن يېشىلىدۇ، ئاندىن ئورنىدىن تۇرۇپ تاھارەت ئالسا ئىككىنچى تۈگۈن يېشىلىدۇ، ناماز ئوقۇسا ھەممە تۈگۈن يېشىلىدۇ – دە، روھلۇق تاڭ ئاتقۇزىدۇ، ئەگەر ئۇنداق قىلمىسا، روھى چۈشكۈن، ھورۇن ھالدا تاڭ ئاتقۇزىدۇ».

ئەي مۆمىن قېرىندىشىم! قولىڭىزدا بەخت سائادەتنىڭ ئاچقۇچى، كۆز ئالدىڭىزدا بولسا خاتىرجەملىك ۋە ئاسايىشلىق ئېلىپ كېلىدىغان، مەنىلىك ھاياتقا ئېرىشتۈرىدىغان، چىرايلىق سۆزلەر ۋە ئەڭ ياخشى سالىھ ئەمەللەر بىلەن ئورالغان نۇرغۇنلىغان ياخشىلىقلار ۋە پۈتمەس – تۈگمەس بايلىقلار تۇرۇپتۇ. بۇ نېمىدېگەن ئالاھىدە ئىمتىياز! نېمىدېگەن چوڭ سالاھىيەت – ھە! بۇ سالاھىيەت مۆمىننى ئاللاھنىڭ شەرىئىتىنى تۇتۇپ ماڭمىغان ھەرقانداق ئادەمدىن پەرقلەندۈرۈپ تۇرىدۇ.

ئەگەر بىز نېمەتلەرگە سەل قاراپ قەدرىگە يەتمىسەك، پەيغەمبەر ئەلەيھىسسالام ناماز ھەققىدە: «مېنىڭ خوشاللىقىم نامازدىدۇر» دەپ كۆرسەتكەن ئىبادەتتىكى ھۇزۇر – ھالاۋەتنى ھېس قىلالمىساق، ئاخىرىدا بۇ نېمەتلەردىن مەھرۇم بولساق ھالىمىز نېمە بولۇپ كېتەر؟

بۈيۈك بەخت، ئەڭ زور خۇشاللىق، ھەقىقىي قەلب شادلىقى، چىن يۈزلىنىش ۋە ھۇزۇر – ھالاۋەت مانا مۇشۇ ئىبادەتلەردە!

ئۇنداقتا، كىممۇ ئۆزى ياخشى كۆرىدىغان، قەلبى سۆيۈنىدىغان نەرسىلەرگە ئىنتىلمەيدۇ؟ ئېنىقكى، ئىنسان ئۇلارنى ئۇچراتسا جەزمەن ئىنتىلىدۇ ۋە ئۆزىنى ئۇنىڭغا ئېرىشىشكە ئاتىۋېتىدۇ. ھەتتا ئۇنىڭ ئۈچۈن بارلىقىدىن كېچىدۇ. شۇڭا، پەيغەمبەر ئەلەيھىسسالام بىرەر كۆڭۈلسىزلىككە يولۇقسا دەرھال نامازغا كىرىشەتتى – دە، شۇندىلا بىر خىل خاتىرجەملىك ۋە بەخت – سائادەتنى ھېس قىلىپ، قەلبىدە يېڭىدىن بىر مۇستەھكەم ئىشەنچ پەيدا بولاتتى. شۇڭا، پەيغەمبەر ئەلەيھىسسالام: «ئەي بىلال، بىزنى ناماز بىلەن ئارام ئالدۇرغىن» دەيتتى.

قېنى، ئۇنداقتا بىزمۇ ئاللاھقا بويسۇنۇش، ئىتائەت قىلىش ۋە ئۇنىڭغا ئىبادەت قىلىش سايىسىدە بۇ ھاياتنىڭ كىشىنى بىئارام قىلىدىغان تۈگىمەس شاۋقۇنلىرىدىن ئارام ئالايلى!

چۈنكى، بۇ، ئىنشائاللاھ، دۇنيادا بەخت – سائادەتكە، ئاخىرەتتە نىجاتلىققا ئېرىشتۈرگۈچى يولدۇر.

دوكتور ئەلى ئۆمەر بادەھدەھنىڭ «ئاللاھ بىلەن مۇناجاتلىشىش ۋە ئۇنىڭغا ئىبادەت قىلىشنىڭ ھۇزۇر – ھالاۋىتى» دېگەن نۇتقىدىن تەرجىمە قىلىندى.

 

تەرجىمىدە: زۇمەر.

2012 – 02 – 24

([1]) «ئەھزاب» سۈرىسى، 41 – ئايەت.

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز