ئەر كىشىنىڭ ئىددەت تۇتۇشى

سوئال: ئەسسالامۇئەلەيكۇم، تۆت خوتۇنى بار كىشى ھەممىسى بىلەن ئاجرىشىپ بەشىنچى خوتۇننى ئېلىش ئۈچۈن ئەر كىشى ئىددەت تۇتامدۇ؟

جاۋاب: ۋەئەلەيكۇم ئەسسالام ۋەرەھمەتۇللاھى ۋەبەرەكاتۇھۇ.

بارلىق ھەمدۇسانا جانابى ئاللاھقا بولسۇن، شۇنداقلا پەيغەمبىرىمىزگە، ئائىلە – تاۋابىئاتلىرىغا ۋە ئۇنىڭغا تاكى قىيامەتكىچە ئەگەشكەنلەرگە دۇرۇت – سالاملار بولسۇن.

ئەر كىشى بىرقانچە ئەھۋالدا ئىددەت تۇتىدۇ:

1. تۆت خوتۇنى بار كىشى تۆت خوتۇنىنى ياكى بىرىنى رەجئى تالاق(1) قىلغان ئەھۋالدا ئاياللارنىڭ ئىددىتى توشۇپ تولۇق ئاجراپ بولغىچە باشقا خوتۇن ئالالمايدۇ. يەنى، ئىددەت تۇتىدۇ.

ئەگەر ئايالىنىڭ ئىددىتى توشۇپ بولغىچە ئايالىنى ئەمرىگە قايتۇرۇۋالسا، باشقا ئايال ئالالمايدۇ.

2. ئايالىنى رەجئى تالاق قىلىپ ئايالىنىڭ ھەمشىرىسى ياكى ھاممىسى ياكى جىيەنىنى ئالماقچى بولسا، تالاق قىلغان ئايالىنىڭ ئىددىتى توشقىچە كۈتۈپ تۇرىدۇ. يەنى، ئىددەت تۇتىدۇ.

ئەگەر ئايالىنىڭ ئىددىتى توشۇپ بولغىچە ئايالىنى ئەمرىگە قايتۇرۇۋالسا، ئايالىنىڭ يۇقىرىقى تۇغقانلىرىنى ئالالمايدۇ.

بۇنداق بولۇشى رەجئى تالاق قىلىنغان ئايال تاكى ئىددىتى توشقانغا قەدەر ئەرنىڭ ئەمرىدە بولغان بولىدۇ، شەرئى جەھەتتىن بەش ئايالنى بىر ۋاقىتتا ئەمرىگە ئېلىش ياكى بىر ئايال بىلەن بىللە نىكاھلىنالمايدىغان ئايالنى ئەمرىدە جەملەش جائىز بولمايدۇ.

ۋەللاھۇ ئەئلەم.

دوكتور ئابدۇلئەزىز رەھمەتۇللاھ

2011. 7 . 17

«پەتۋالار مەجمۇئەسى»، 1 – توم، 413 – بەت. 104 – نومۇرلۇق پەتۋا.

—————————–
1. رەجئى تالاق – بىر ياستۇقتا باش قويغان ئايالىنى بىر ياكى ئىككى قېتىم قىلغان تالاق بولۇپ، ئەر خالىسا ئىددىتى توشقىچە ئۇنى ئەمرىگە قايتۇرۇۋالالايدۇ.

جاۋاب يېزىش

ئېلېكتىرونلۇق خەت ئادرېسىڭىز ئاشكارىلانمايدۇ. * بەلگىسى بارلارنى چوقۇم تولدۇرۇسىز